विजय शिंदे
मुख्यमंत्री माझी लाडकी बहीण योजना ही महायुती सरकारची अत्यंत महत्त्वाकांक्षी योजना आहे. विधानसभा निवडणुकीत ही योजना टर्निंग पॉईंट ठरली. महायुतीला महाविजय मिळवून देणाऱ्या लाडक्या बहिणींसाठी आता सरकार मोठा निर्णय घेत आहे.
या निर्णयामुळे लाडक्या बहिणींना 30 ते 40 हजार रुपयांपर्यंतचे अर्थसहाय्य मिळणार आहे. राज्याचे उपमुख्यमंत्री अजित पवार यांनी याबाबत नेमके काय म्हटले जाणून घेऊयात…राष्ट्रवादी काँग्रेस पक्षाचा नांदेड येथे एक कार्यक्रम पार पडला. यावेळी अजित पवारांनी लाडक्या बहिणींना एक आनंदाची बातमी दिली आहे. अजित पवार म्हणाले, लाडक्या बहिणींना सांगायचं आहे की, अनेकजण योजनेबाबत गैरसमज पसरवतात. लाडक्या बहिणींना दरमहा 1500 रुपये दिले जात आहेत. एखाद्या महिन्यात हप्ता मिळण्यास उशीर झाला तर विरोधक अफवा पसरवतात. लाडक्या बहिणींनी या अफवांवर विश्वास ठेवू नये. लाडकी बहीण योजना बंद होणार नाहीये.अजित पवार पुढे म्हणाले की, लाडक्या बहिणींना दरमहा लाभ मिळत राहणार आहे आणि योजना बंद होणार नाहीये. उलट नवा प्रस्ताव आणला जात आहे. त्यासाठी काही बँका पुढे आल्या आहेत. नांदेड जिल्हा बँकेसोबत मी बोलणार आहे. काही सहकारी बँका खूप चांगल्या आहेत. योजनेचे दरमहा 1500 रुपये लाडक्या बहिणींना मिळतात. त्याऐवजी लाडक्या बहिणींना 30 ते 40 हजार रुपयांपर्यंतचे अर्थसहाय्य द्यायचे आणि त्या कर्जाचा हप्ता योजनेतून वळता करता येईल. सरकार बँकांसोबत चर्चा करुणार असून महिलांना उद्योगासाठी भांडवल म्हणून 30 ते 40 हजार रुपये उपलब्ध करुन देण्याचा विचार आहे.
लाडक्या बहिणींना उद्योग सुरू करायचा असेल आणि भांडवल नसल्यास या योजनेच्या हमीवर लघु उद्योगांसाठी कर्ज उपलब्ध करुन देण्याचा सरकारचा प्रयत्न आहे. या कर्जाचा हप्ता लाडकी बहीण योजनेच्या पैशांतून भरण्याची योजना सरकारच्या विचारात आहे असंही अजित पवार म्हणाले. राज्य सरकारने महिलांना आर्थिक दृष्ट्या सक्षम करण्यासाठी मुख्यमंत्री माझी लाडकी बहीण योजना सुरू केलेली आहे. राज्यातील 2 कोटींहून अधिक बहिणींच्या खात्यात थेट पैसे जमा होत आहेत. लाडक्या बहिणींना दरमहा 1500 रुपये राज्य सरकारकडून देण्यात येत आहेत. पात्र महिलांच्या बाँक खात्यात थेट डीबीटी मार्फत पैसे जमा होत आहेत. आतापर्यंत एकूण 10 हप्ते लाडक्या बहिणींना देण्यात आले आहेत. आता मे महिन्याचा म्हणजेच 11वा हप्ता लाडक्या बहिणींना मिळणार आहे.
